యానిమల్ రివ్యూ....
టైటిల్ : యానిమల్
తారాగణం : రణబీర్ కపూర్, రష్మికా మందన్న, అనిల్ కపూర్, బాబి డియోల్,
కెమెరా : అమిత్ రాయ్
సంగీతం : హర్షవర్ధన్ రామేశ్వర్
నిర్మాత : భూషణ్ కుమార్, ప్రణయ్ రెడ్డి వంగా
కథ : ఎడిటింగ్– దర్శకత్వం– సందీప్రెడ్డి వంగా
విడుదల : డిసెంబర్– 1– 2023
కథ :
సినిమా కథలోకి వెళ్తే 2056లో రణభీర్ కపూర్ (విజయ్ సింగ్) తన కజిన్స్తో కూర్చుని ఒక కోతి కథను చెప్తూ అందరిని నవ్విస్తుంటాడు. అక్కడనుండి తన చిన్నతనంలోని స్కూల్ మెమొరీస్కి తీసుకువెళతాడు. ప్రతి మనిషి జీవితంలో ఏ బిడ్డకైనా నిజమైన హీరో తండ్రే. కానీ, భాద్యత గల ఆ తండ్రికి కుటుంబంతో గడిపే సమయం దొరకదు. తెలియకుండానే రోజులు వారాలవుతాయి. వారాలు నెలలు అవుతాయి. నెలలు సంవత్సరాలు అవుతాయి. తెలియకుండానే ఇంట్లో పిల్లలు పెద్ద వాళ్లవుతారు. ఆ పిల్లలు ఎలా ఫీలవుతున్నారో తండ్రికి తెలియదు. ఆ తండ్రి ఏం మిస్సయ్యాడో ఆయనకు తెలియదు. మొత్తానికి కాలం గడిచిపోతుంది. అందరి జీవితాల్లో ఇదే జరుగుతుంది కదా! ఇది చాలా సర్వ సాదారణమైన విషయమే కదా, దీనిగురించి ఏముంది అని ఎవరైనా అనుకుంటారు. కానీ రణవీర్సింగ్ లాంటి క్యారెక్టర్ ఉన్న వారు మాత్రం అలా అనుకోరు. నాన్నని హీరోలా చూడటమే కాదు. నువ్వు నా హీరోవి అని నాన్న అనిల్ కపూర్కి, నాన్నతో పాటు ఉండే చుట్టుపక్కలవారికి, కుటుంబానికి, ప్రేమించిన అమ్మాయికి ఎన్ని రకాలుగా చెప్పచ్చో అన్ని రకాలుగా చెప్తాడు హీరో విజయ్. అలాంటి నాన్నపై హత్యాప్రయత్నం జరిగితే పిచ్చి ప్రేమున్న ఆ కొడుకు ఏం చేస్తాడు? చివరకి నాన్నను కాపాడాడా? లేదా? అనేది 70MM స్క్రీన్పై నోరెళ్లబెట్టి చూడాల్సిందే.
నటీనటుల పనితీరు...
నటీనటులందరిలోకి ముగ్గురి గురించి ప్రత్యేకంగా చెప్పుకోవాలి. రష్మికా, రణ్బీర్ కపూర్, అనిల్ కపూర్ల నటన గురించి అందరికి తెలుసు. కానీ ‘యానిమల్’ సినిమాలోని వీరి నటనకు అంతకుముందు వీరు చేసిన సినిమాల్లోని నటనకు ఎంతో వ్యత్యాసముంది. ప్రతి ఒక్క ఫ్రేమ్లో వీరు తమ తమ పాత్రల్లో ఎలా నిలుచున్నారో చెప్పటానికి మాటలు సరిపోవు. చూసి ఎంజాయ్ చేయాల్సిందే. కొన్ని కొన్ని సీన్లలో వీరు నటిస్తున్నారా? లేదా మనం స్క్రీన్ మీద చూస్తున్నది నిజంగా జరుగుతున్నాయా? అన్నట్లుగా ఉంటుంది. ఇంతకంటే ఆ పాత్రల్లో వేరేవాళ్లని ఊహించుకోలేం. అంతబాగా నటించారందరూ. బాబిడియోల్ పాత్ర చిన్నదైనా కూడా ఎంతోబాగా నటించాడు.
ఎలా తీశారు...
సినిమా ప్రారంభం నుండి బిలియనీర్ల ఫ్యామిలీకి సంబంధించిన కుటుంబం కావటంతో పెద్ద పెద్ద బంగళాలు, రేంజ్రోవర్ కార్లు, విమానాలు అబ్బ ఇలా ఉంటుందా లైఫ్ అనే విధంగా పాత్రలను డిజైన్ చేయటంతో ఆర్ట్ డిపార్ట్మెంట్, మేకప్, కెమెరా వర్క్లకు చేతినిండా పని ఉంటుంది. ఆ పనిని ఎంతో సమర్ధవంతంగా చేశారు వారంతా. ఇకపోతే చాలా చోట్ల హిందీ సినిమా కాబట్టి ఇలా ఉందేమో అనేలా కొన్ని సీన్లు డిజైన్ చేశారు. ఇలా ప్రతి ఒక్కటి కూడా నచ్చేవిధంగా కొత్తగా ఉంటుంది. సినిమాను ఇలా తీయాలి అనే ఒక పారామీటర్ ఉంటుంది అనుకుంటారెవరైనా. కానీ, ఆ పరిధులన్నింటిని తుంగలో తొక్కి సినిమాని ఇలా కూడా తీయొచ్చు అని అందరికి అర్ధమయ్యేలా తన స్టైల్లో చెప్పారు సందీప్ రెడ్డి వంగా.
ప్లస్లు :
– సినిమా కథ–కథనం
–డైరెక్టర్ ఎడిటర్ ఒక్కరే అవ్వటం
– రణ్బీర్, రష్మికల కెమిస్ట్రీ, ఫిజిక్స్
– బ్యాక్గ్రౌండ్ స్కోర్
మైనస్లు : శ్రుతిమించిన రక్తపుటేరులు
ట్యాగ్లైన్ : యానిమల్ గుర్తుకువచ్చిన ప్రతిసారి హాంట్ చేస్తూనే ఉంటుంది..
రేటింగ్ : 4/5 శివమల్లాల